احسن بھون نے کیپٹن ریٹائرڈ صفدر کو 5 ارب روپے ہرجانے کا نوٹس بھجوادیا

اسلام آباد(جیو نیوز)سینیئر وکیل احسن بھون نے کیپٹن ریٹائرڈ صفدر کو 5 ارب روپے ہرجانے کا نوٹس بھجوادیا۔ نوٹس کے متن میں کہا گیا ہے کہ یہ نوٹس جھوٹے اور شدید ہتک آمیز الزامات کے نتیجے میں بھیجا جارہا ہے۔ نوٹس میں کہا گیا کہ احسن بھون کی تعلیمی قابلیت اور وکالت کے بارے میں الزامات عائد کیے گئے، کیپٹن صفدر نے ایسے دعوے کیے جو براہ راست احسن بھون پرحملہ ہیں۔ نوٹس میں مطالبہ کیا گیا کہ کیپٹن ریٹائرڈ صفدر 7 دن کے اندر غیر مشروط معافی مانگیں۔ دوسری جانب سپریم کورٹ کے باہر میڈیا سے گفتگو کرتے ہوئے کیپٹن ریٹائرڈ صفدر نے کہا کہ جعلی ڈگریوں کی بحث اب ملک میں دوبارہ شروع ہوگئی ہے۔ سیاست دانوں کی جعلی ڈگریوں کا معاملہ بھی آیا تھا، وکلا ڈگری دکھا دیں تو میں ان سے معافی مانگوں گا۔ کیپٹن صفدر نے کہا کہ اعظم نذیر تارڑ نے جو باتیں کیں ان سے ان کا کیس کمزور ہوا، اعظم نذیر تارڑ سیاست میں مجھ سے جونیئر ہیں، جعلی ڈگریوں کے خلاف اعظم نذیر تارڑ کو لڑنا چاہیے۔ انہوں نے مزید کہا کہ مسلم لیگ (ن) ہماری جماعت ہے، سیاست سے ہٹ کر یہ کام کر رہا ہوں۔