جمہوریت عوام کے ووٹ سے چلے، سیاسی سودے بازی، دولت اور دھاندلی سے نہیں!

جمہوریت عوام کے ووٹ سے چلے، سیاسی سودے بازی، دولت اور دھاندلی سے نہیں!
انتخابی اصلاحات یا سیاسی دھندوں کا تحفظ؟ پاکستان میں سینیٹرز کا انتخاب براہِ راست عوامی ووٹ سے ہو، مخصوص نشستوں کا خاتمہ اور دھاندلی کرنے والوں کی فوری برطرفی! اگر حکومت اور اپوزیشن واقعی انتخابی اصلاحات کے لیے سنجیدہ ہیں تو آنے والی پارلیمانی کمیٹی کو روایتی سیاسی مفادات کے بجائے عوام کے حقِ حکمرانی کو ترجیح دینا ہوگی۔ ایسی اصلاحات کی جائیں جو انتخابی نظام کو طاقتور سیاسی گروہوں اور مالی مفادات کے شکنجے سے آزاد کر سکیں۔ 1۔ سینیٹ کے انتخابات براہِ راست عوامی ووٹ سے ہوں! پاکستان میں سینیٹرز کے انتخاب کا موجودہ بالواسطہ نظام سیاسی خریدوفروخت، سودے بازی اور دولت کے استعمال کے الزامات سے بار بار متنازع ہوتا رہا ہے۔ میرا واضح مطالبہ ہے کہ سینیٹرز کو چند ارکانِ اسمبلی کے ووٹوں کے بجائے عوام کے براہِ راست ووٹ سے منتخب کیا جائے، جیسا کہ امریکہ میں 1913ء سے رائج ہے۔ سینیٹ عوام کا ایوان بنے، سیاسی لین دین کا مرکز نہیں! 2۔ مخصوص نشستوں کا موجودہ نظام ختم کیا جائے! قومی، صوبائی، سینیٹ اور بلدیاتی اداروں میں مخصوص نشستوں کے ذریعے سیاسی جماعتوں کو اضافی طاقت دینے کا موجودہ طریقہ ختم کیا جائے۔ نمائندگی کا حق عوامی ووٹ اور شفاف انتخابی عمل سے حاصل ہونا چاہیے، نہ کہ جماعتی نامزدگیوں اور سیاسی وفاداریوں کے ذریعے۔ خواتین، اقلیتوں اور محروم طبقات کی نمائندگی ضرور محفوظ ہو، مگر اس کے لیے ایسا متبادل انتخابی طریقہ بنایا جائے جو حقیقی عوامی مینڈیٹ پر مبنی ہو، سیاسی جماعتوں کی من پسند تقسیم پر نہیں۔ 3۔ انتخابی دھاندلی کرنے والوں کی فوری برطرفی اور سخت سزا! جعلی ووٹ، ووٹوں کی تبدیلی، بیلٹ باکس غائب کرنے، نتائج میں جعلسازی یا انتخابی عمل میں دانستہ مداخلت ثابت ہونے پر متعلقہ سرکاری اہلکاروں کو ملازمت سے برطرف کیا جائے اور سخت قانونی سزا دی جائے۔ ریٹرننگ افسر، پریزائیڈنگ افسر یا کوئی بھی انتخابی ذمہ دار قانون سے بالاتر نہ ہو۔ تحقیقات غیرجانبدار، فیصلہ بروقت اور سزا بلاامتیاز ہو۔ انتخابی عملے کی غفلت یا ملی بھگت پر محض تبادلہ یا معمولی محکمانہ کارروائی کافی نہیں ہونی چاہیے۔ 4۔ انتخابی ٹریبونلز میں برسوں کے مقدمات کا خاتمہ! انتخابی شکایات کا فیصلہ مقررہ مختصر مدت میں کیا جائے۔ اگر انتخابی نظام شفاف، نگرانی مؤثر اور دھاندلی پر فوری سزا یقینی ہو تو انتخابی تنازعات اور برسوں زیرِ التوا مقدمات میں نمایاں کمی آ سکتی ہے۔ میرا دوٹوک مؤقف ہے کہ جمہوریت چند خاندانوں، سیاسی جماعتوں یا دولت مند گروہوں کی جاگیر نہیں۔ عوام کا ووٹ ہی اقتدار کا اصل سرچشمہ ہے۔ اگر آنے والی انتخابی اصلاحات میں براہِ راست عوامی ووٹ، شفاف نمائندگی اور دھاندلی پر سخت احتساب شامل نہیں تو ایسی اصلاحات محض سیاسی دکھاوا ہوں گی۔ پاکستان کو ایسی جمہوریت چاہیے جہاں نمائندے عوام کے ووٹ سے منتخب ہوں، عوام کے سامنے جواب دہ ہوں اور انتخابی عمل میں خیانت کرنے والوں کے لیے کوئی رعایت نہ ہو۔

Comments 0

Sort by:

Join the discussion respectfully. Read our Community Guidelines. To report abuse or a policy issue, email [email protected].

Login to post a comment.