"نئی نسل کی معیاری تعلیم و تربیت ہی قوم کی ترقی کی ضامن ہے، پرائمری سکول کے طلبا ہمارے مستقبل کی بنیاد ہیں" غلام نبی مری

کوئٹہ (پ ر) بلوچستان نیشنل پارٹی (بی این پی) کے مرکزی ایگزیکٹو کمیٹی کے ممتاز رہنما غلام نبی مری نے کہا ہے کہ پرائمری سکول کے طالب علم ہماری قوم کا حقیقی سرمایہ اور بنیاد ہیں اور یہی وہ عمر ہے جو بچوں کے سیکھنے اور ان کی ذہنی نشوونما کے لیے سب سے بہترین اور موزوں ترین ہوتی ہے۔ آج کمپیوٹر اور ٹیکنالوجی کی برق رفتار ترقی کے اس جدید دور میں اگر ہمیں دنیا کا مقابلہ کرنا ہے تو ہمیں اپنی نئی نسل کی تعلیم و تربیت پر سب سے زیادہ اور بھرپور توجہ دینی ہوگی۔ ان خیالات کا اظہار انہوں نے گورنمنٹ پرائمری سکول کلی غریب آباد، بڑو، جدید میاں خان میں منعقدہ سالانہ رزلٹ اور تقریبِ تقسیمِ انعامات کے موقع پر بطور مہمانِ خصوصی خطاب کرتے ہوئے کیا۔ اس باوقار اور پروقار تقریب میں تعلیمی شعبے سے وابستہ نامور اساتذہ، جن میں ماسٹر اللہ بخش بلوچ اور ماسٹر امان اللہ شاہوانی، محمد رمضان شانی بلوچ، ٹکری آغا رودینی، طلبا کے والدین اور علاقے کے معتبرین و عمائدین نے بڑی تعداد میں شرکت کی۔ تقریب سے خطاب کرتے ہوئے مہمانِ خصوصی غلام نبی مری نے تعلیم کی اہمیت پر سیر حاصل گفتگو کرتے ہوئے کہا کہ جو کم عمر اور معصوم بچے آج ہمارے سامنے ان بینچوں پر بیٹھے ہیں، کل یہی بچے ملک و قوم کی باگ ڈور سنبھالیں گے اور مختلف شعبہ ہائے زندگی میں بلوچستان کا نام روشن کریں گے۔ انہوں نے والدین اور اساتذہ پر زور دیا کہ وہ بچوں کو صرف کتابی علم تک محدود نہ رکھیں بلکہ ان کی اخلاقی اور نظریاتی تربیت پر بھی یکساں توجہ دیں تاکہ وہ ایک ذمہ دار شہری بن کر ابھریں۔ ان کا مزید کہنا تھا کہ بی این پی ہمیشہ سے صوبے کے پسماندہ علاقوں میں تعلیمی ڈھانچے کی بہتری اور غریب بچوں کو یکساں تعلیمی مواقع فراہم کرنے کی حامی رہی ہے۔ اس موقع پر ماسٹر اللہ بخش بلوچ اور ماسٹر امان اللہ شاہوانی نے بھی خطاب کیا اور سکول کی سالانہ کارکردگی رپورٹ پیش کی۔ انہوں نے محدود وسائل کے باوجود بچوں کو بہترین تعلیم دینے کے عزم کا اعادہ کیا۔ تقریب کے اختتام پر مہمانِ خصوصی غلام نبی مری اور دیگر معززین نے شش ماھی امتحانات میں نمایاں پوزیشنیں حاصل کرنے والے ہونہار طالب علموں میں رزلٹ کارڈز، چمکتی ہوئی ٹرافیاں، تعلیمی بیگز اور دیگر خصوصی انعامات تقسیم کیے۔ انعامات حاصل کرنے پر بچوں کے چہروں پر خوشی دیدنی تھی، جبکہ والدین اور معتبرینِ علاقہ نے سکول انتظامیہ کی اس شاندار کاوش کو خوب سراہا اور مہمانِ خصوصی کا شکریہ ادا کیا۔