بلوچستان کی سیاسی و حکومتی قیادت کی بیٹھک، اتحادی جماعتوں کا صوبائی حکومت پر مکمل اعتماد، امن و ترقی کے ایجنڈے پر یکجہتی

بلوچستان کی سیاسی و حکومتی قیادت کی بیٹھک، اتحادی جماعتوں کا صوبائی حکومت پر مکمل اعتماد، امن و ترقی کے ایجنڈے پر یکجہتی وزیر اعلی سیکرٹریٹ کوئٹہ میں بلوچستان کی تمام اتحادی جماعتوں کی اعلیٰ صوبائی قیادت اور اراکینِ اسمبلی کی بڑی بیٹھک جمعہ کومنعقد ہوئی، جس میں اہم سیاسی و حکومتی امور پر تفصیلی مشاورت کی گئی۔ اجلاس میں گورنر بلوچستان شیخ جعفر خان مندوخیل، وزیر اعلی میر سرفراز بگٹی، اسپیکر بلوچستان اسمبلی عبدالخالق اچکزئی اور ڈپٹی اسپیکر غزالہ گولہ نے خصوصی شرکت کی۔اجلاس میں پاکستان مسلم لیگ (ن)بلوچستان کے جنرل سیکرٹری ورکن قومی اسمبلی جمال شاہ کاکڑ، پارلیمانی لیڈر میر سلیم خان کھوسہ، پیپلز پارٹی کے صوبائی صدر سردار عمر گورگیج، بلوچستان عوامی پارٹی کے پارلیمانی لیڈر نوابزادہ طارق مگسی، میر صادق سنجرانی اور عوامی نیشنل پارٹی کے بلوچستان اسمبلی میں پارلیمانی لیڈر انجینئر زمرک خان اچکزئی بھی شریک ہوئے۔مشاورتی اجلاس میں بلوچستان کی مجموعی سیاسی صورتحال، امن و امان کی فضا، اور جاری ترقیاتی منصوبوں کا تفصیلی جائزہ لیا گیا۔ اتحادی جماعتوں نے صوبائی حکومت پر مکمل اعتماد کا اظہار کرتے ہوئے سیاسی استحکام کے لیے مل کر آگے بڑھنے کا عزم کیا۔شرکا نے بلوچستان میں قیام امن کے لیے کیے گئے حالیہ اقدامات پر اطمینان کا اظہار کیا اور مزید بہتری کے لیے تجاویز پیش کیں۔ اجلاس میں ترقیاتی منصوبوں کی رفتار تیز کرنے، گڈ گورننس کے فروغ اور عوامی ضروریات کے مطابق فلاحی اقدامات کو مثر بنانے کے لیے مشترکہ حکمت عملی پر اتفاق ہوا۔گورنر بلوچستان شیخ جعفر خان مندوخیل نے کہا کہ صوبے میں امن اور ترقی کے ایجنڈے پر یکجہتی خوشگوار سیاسی ماحول کی عکاسی کرتی ہے۔ اجلاس کا اختتام اس عزم کے ساتھ ہوا کہ صوبے کے عوام کی فلاح و بہبود کے لیے سیاسی و حکومتی اتفاقِ رائے کو مزید مضبوط بنایا جائے گا۔وزیر اعلی میر سرفراز بگٹی نے اجلاس سے خطاب کرتے ہوئے کہا کہ سیاسی ہم آہنگی اور مضبوط پارلیمانی رابطے صوبے کے مستقبل کی ضمانت ہیں، ہم سب کا مشترکہ وژن ہی ہماری اصل قوت ہے۔ بلوچستان کی ترقی اور امن کے لیے تمام اتحادی یکجا ہیں۔انہوں نے اتحادی جماعتوں کی تجاویز کو خوش آئند قرار دیا۔